ಸಾವಿನ ಚೆಲುವೆ !!

ಸಾವಿನ ಮೋಹಕ ಚೆಲುವೆ ಎಂದೇ ಬಣ್ಣಿಸಲಾಗುತಿಹಳವಳು !

ಜೀವನದೆಲ್ಲಾ ತಳಮಳ - ತೊಳಲಾಟಗಳಿಂದ ಮುಕ್ತಿವೀಯ್ವಳಂತವಳು !

ಅವಳೇ ಇರಬಹುದೆ ಬದುಕ ಕೊರತೆ 

ನೀಗಿಸಿ ನಲಿಸುವ ದೇವತೆ ?

ಆದರೆ, ಈ ವರ್ಣನೆಗಳು -

ಅವರಿವರ ಅಭಿಪ್ರಾಯ, ಭಾವನೆಗಳು.

ಅನುಭವಿಸದೆ ಅವಳೊಡನೆ ಆಪ್ಯಾಯತೆ -

ಅರಿಯಲಿ ಹೇಗೆ ನಾ ಅ ಘನತೆಯ ನೈಜತೆ?

ತಿಳಿಯೆ ನಾ ಅವಳನ್ನು,

ಆದ್ದರಿಂದಲೇ ಅವಳ ಬಗೆಗೆ ಈ ಕುತೂಹಲ - ಜಿಜ್ಞಾಸೆಗಳು.

ಅರಿತರೊಮ್ಮೆ ಅವಳ ಅಂತರಾಳವನ್ನು -

ಬತ್ತಿ ಹೋಗವೆ ಈ ಚಿಮ್ಮುವ ಉತ್ಸಾಹದ ಸೆಲೆಗಳು?

ಇಂತೆಯೇ ಇರಲಿ ನನ್ನೊಳು ಈ ಉತ್ಸಾಹ,

ಅರಳುತಿರಲಿ ಅದರ ಬೆನ್ನತ್ತಿ ಬರುವ ಉನ್ಮಾದ!

ಕಂಡು, ತಿಳಿದು, ಅನುಭವಿಸಿ ಮರೆವ ಯಾಂತ್ರಿಕತೆಗಿದೋ ನನ್ನ ನಕಾರ,

ನಿರೀಕ್ಷೆಯ ಗಳಿಗೆಗಳು, ಕನಸ್ಸಿನ ಮಳಿಗೆಗಳು - ಇವೇ ನನಗೆ ಸಾಕ್ಷಾತ್ಕಾರ!

ಅವಳ ಮೋಹಕತೆಯ ಕಪೋಕಲ್ಪಿತ ಕಥೆಗಳು,

ಮರಣದಾಚೆಗೆ ಬದುಕುಳಿದವರ ಹೇಳತೀರದ ವ್ಯಥೆಗಳು.

ಮುಗ್ಧತೆಯ ತಬ್ಬಿ, ತನ್ನ ತಾ ಸಂತೈಸಿದೆ ಮನವು,

ಏಳು-ಬೀಳಿನ ಜೀವ ಜ್ವಾಲೆಯಲಿ ಬೇಯಲೊಪ್ಪಿದೆ ತನುವು!