ಸ್ನೇಹಕ್ಕೆ ಪ್ರೇಮವೇ ಅಪಚಾರ!?

ಮೋಡದಂಚಿನಿಂದ ಮೂಡಿ ಬರುವ ಚಂದಿರ

ತರುವ ಆ ನಿನ್ನ ಜೊತೆಗಿನ ನೆನಪು, ಅದೆಷ್ಟು ಸುಂದರ.

ನಿನ್ನ ನುಡಿಯ ನೆನೆದರೆ ಇಂದಿಗೂ ಕೋಗಿಲೆಯ ಇಂಚರ.

ಗೆಳತಿ, ಏಕೆ ನೀನಿಲ್ಲದೀ ಬಾಳು ಇಷ್ಟು ಬೇಸರ?

ನಮ್ಮ ನಡುವಿನ ಸ್ನೇಹವಾಗಿತ್ತದೆಷ್ಟು ಶಾಂತ-ಸುಮಧುರ,

ಮೋಹ ಕಾಮದ ಛಾಯೆಯಲಿ ನಲುಗಿ ಹೋಯಿತದು ತತ್ತರ.

ಸುಲಲಿತ ಸುಮನೋಹರ ಸ್ನೇಹಕ್ಕೆ ಪ್ರೇಮವೇ ಅಪಚಾರ!?

ಗೆಳತಿ, ಏಕೆ ತಂದೆವು ನಮ್ಮ ನಡುವೆ ಪ್ರೀತಿಯ ವಿಚಾರ?

ಹೂವೊಳಗಿನ ಹಣ್ಣಿನಂತೆ ಇಹದೆ ಸ್ನೇಹದೊಳು ಪ್ರೇಮದ ಆಗರ?

ಸದಾಶಯ ಸದ್ಭಾವನೆಗಳ ಸ್ನೇಹ - ಪರಿಶುದ್ಧ ಪ್ರೀತಿಯ ಅವತಾರ,

ಆದರೂ ಸ್ನೇಹ-ಪ್ರೇಮದ ದ್ವಂದ್ವ ವಿಷಮ ವ್ಯೋಮದ ಶ್ರೀಕಾರ.

ಗೆಳತಿ, ಏಕೆ ಸಿಲುಕಿದೆವು ವ್ಯೋಮದೊಳು? ತಿಳಿಯದು ಪರಿಹಾರ!